Михаил Афанасьев Татарстанның Лаеш районы башкарма комитеты җитәкчесе итеп билгеләнде

(Лаеш, 23 июль, “Татар-информ”, Алия Сабирова). Бүген Татарстан Премьер-министры Илдар Халиков Татарстанның Лаеш муниципаль районы вәкиллекле органы утырышында катнашты.
Лаеш район Советының 69 нчы сессиясендә Михаил Афанасьев Лаеш муниципаль районы башкарма комитеты җитәкчесе итеп билгеләнде. Искәртеп узабыз, июнь ахырында М.Афанасьев Лаеш районы башкарма комитеты җитәкчесе вазифаларын башкаручы итеп билгеләнгән иде.
Депутатлар алдында ясаган чыгышында ул районны төзекләндерү һәм аны алга таба үстерү өчен мөмкин булганның барысын да эшләячәген вәгъдә итте.
Үз чиратында, Илдар Халиков Михаил Афанасьев кандидатурасын хуплаганы өчен депутатлар корпусына рәхмәт белдерде. Ул Лаеш районы башкарма комитеты җитәкчесенә уңышлар теләде.