Татарстанга эш сәфәре белән Игорь Комаров килде

Россия Президентының Идел буе федераль округындагы Тулы вәкаләтле вәкиле сәфәренең төп максаты — Татарстан буенча баш федераль инспекторны тәкъдим итү.

(Казан, 23 март, «Татар-информ»). Бүген Татарстанга Россия Президентының Идел буе федераль округындагы Тулы вәкаләтле вәкиле Игорь Комаров килде. Бу хакта республика җитәкчесенең матбугат хезмәте хәбәр итә.

«Казан» халыкара аэропортында Игорь Комаровны Татарстан Республикасы Президенты Рөстәм Миңнеханов һәм башка рәсми затлар каршы алды», — диелә хәбәрдә.

Сәфәрнең төп максаты булып, Татарстан Республикасы буенча баш федераль инспекторны тәкъдим итү тора. Казанга килүгә үк Тулы вәкаләтле вәкил Рөстәм Миңнеханов белән очрашу уздырачак.