Рөстәм Миңнеханов җитәкчелегендәге ТР делегациясе – Казахстанда

Татарстанлылар Россия һәм Казахстан чик буе регионнары җитәкчеләренең V форумында катнаша
(Казан, 22 сентябрь, «Татар-информ»). Бүген Премьер-министр Рөстәм Миңнеханов җитәкчелегендәге Татарстан делегациясенең Казахстанның Актүбә шәһәренә сәфәре башланды. Делегация составында – беренче вице-премьер Борис Павлов, икътисад министры Марат Сафиуллин, ТР Казахстандагы вәкаләтле вәкиле Илдус Тарханов. Татарстанлылар Россия һәм Казахстан чик буе регионнары җитәкчеләренең V форумында катнаша, дип хәбәр итә ТР Министрлар Кабинетының матбугат хезмәте.
Бүген бирегә эш визиты белән РФ Президенты Дмитрий Медведев та килде. Ил башлыгы Казахстан Президенты Нурсолтан Назарбаев белән Россия-Казахстан мөнәсәбәтләрен үстерү мәсьәләләре хакында сөйләшәчәк.
Форум кысаларында кунаклар Россия-Казахстан товар җитештерүчеләре әзерләгән «Югары технологияләр – төбәкләргә. Чик буе хезмәттәшлеге» дигән күргәзмә белән дә танышачак. Программага моннан тыш, Свято-Никольский православ храмында булу, Актүбә өлкә үзәк мәчетен ачу тантанасында катнашу каралган.