Рөстәм Миңнеханов Швейцариягә эшлекле сәфәр кыла

(Казан, 22 март, «Татар-информ», Арсений Маврин). Бүген Татарстан Президенты Рөстәм Миңнеханов җитәкчелегендәге республиканың рәсми затларыннан торган делегация Швейцариягә юл тота. Бу хакта ТР Хөкүмәте сайтында хәбәр ителә.

Сәфәрнең максаты - Швейцариянең IT-инфраструктура объектлары белән танышу.

Татарстан Президенты Швейцариядә ике көн булачак. Визитның программасы әле билгеле түгел, шул ук вакытта, ТР мәгълүматлаштыру һәм элемтә министры Роман Шәйхетдинов CERN – атом-төш тикшеренүләр буенча Европа оешмасы бүлекчәсендә булырга өлгергән инде (Казан федераль университеты һәм Иннополис университеты әлеге оешма белән хезмәттәшлек итә – Т-и иск.).

ТР мәгълүматлаштыру һәм элемтә министры шулай ук Ивердон-ле-Бен шәһәрендә Швейцариянең иң зур Y-PARC – Swiss Technopole фәнни-техник паркында булып, кояш батареялары белән эшли торган һәм кешене стратосферага алып менәргә сәләтле очкыч төзү перспективалары белән танышкан.