Путин дистанцион уку көндезге укуны кысрыклаячак дигән сүзләрне провокация диде
Россия Президенты мәгариф өлкәсендә IT-системаларны үстерүне тәэмин итәргә кушты.
(Казан, 21 май, «Татар-информ»). Россия Президенты Владимир Путин Россиядә дистанцион белем бирүне вакыт узу белән көндезге укуны алмаштыра алуы турындагы хәбәрне провокация дип атады. Бу хакта дәүләт башлыгы Covid-19 коронавирусының таралуы шартларында мәгариф системасындагы вазгыять турындагы киңәшмәдә белдерде.
Владимир Путин үз чыгышында мәктәпләрне тизләтелгән интернетка тоташтыру эшен кызулатырга һәм мәгариф өлкәсендә IT-системаларны үстерүне тәэмин итәргә кушты. Шул ук вакытта ул цифрлы технологияләр мәктәпләрдә тере аралашуны, укытучы һәм укучы белән турыдан-туры элемтәне алмаштырмаячак, дип искәртте.
«Традицион мәктәпләр һәм университетлар ябылачак, аларны дистанцион белем бирү тулысынча алмаштырачак дигән имеш-мимешләргә ачыктан-ачык провокация дип карыйм. Өстәвенә, мәгариф системасы өйрәтү генә түгел, ул тәрбияли дә, шәхес формалаштыра, җәмгыятебез нигез салган кыйммәтләрне һәм гореф–гадәтләрне тапшыра», - диде Путин.
Россия Президенты Федераль Җыенга еллык Юлламасында сыйныф җитәкчеләре өчен аена 5 мең сум күләмендә махсус федераль өстәмәләр кертү турында әйткәнлеген искә төшерде. Һәм бу чара яңа уку елы башыннан гамәлгә керәчәк, дип өстәде.