Миңнеханов: 2030 елга кадәр Татарстанда 3,5 миллион квадрат метр торак төзү ниятләнә

Татарстан Президенты билгеләп үткәнчә, республика халкы арасында торакка булган ихтыяҗ һәм тәкъдим арасында баланс табу мөһим.

(Казан, 21 гыйнвар, «Татар-информ», Арсений Кәримов). 2030 елга кадәр Татарстанда 3,5 миллион квадрат метр торак сафка бастыру ниятләнә. Халыкның аны сатып алу өчен финанс мөмкинлеге булуы мөһим, шунлыктан ихтыяҗ һәм тәкъдим арасындагы балансны үтәргә кирәк.

ТР Президенты Рөстәм Миңнеханов республика Төзелеш, архитектура һәм ТКХ министрлыгы коллегиясенең йомгаклау утырышында шулай дип белдерде.

«Бурыч гадиләрдән түгел: 2030 елга торак төзелеше күләме 3,5 миллион квадрат метрга җитәргә тиеш. Безнең алда шуның кадәр торак сафка бастыра алырбызмы-юкмы дигән сорау тормый. Гражданнарның сатып алу мөмкинлеге булырга тиеш. Бу базарда финанс ихтыяҗы һәм тәкъдим арасында баланс табу мөһим», - дип искәртте Рөстәм Миңнеханов.

Татарстан Президенты шулай ук Казан, Кама һәм Әлмәт агломерацияләрен үстерү дә алдагы планга керүен әйтте.