Рәсим Акчурин ТР Президентын “Ак Барс” командасының җиңүе белән котлады

“Мәскәүнең бөтен татар җәмгыяте үзенең яраткан командасының уенын игътибар белән күзәтте һәм бары тик җиңү көтте”, – диелә телеграммада
(Казан, 18 апрель, “Татар–информ”). Татарстан Республикасы Президенты Минтимер Шәймиев исеменә Мәскәүнең Төбәк татар милли–мәдәни мохтәрияте рәисе Рәсим Акчурин һәм Төбәк татар милли–мәдәни мохтәриятенең Татар мәдәният үзәге директоры Әнвәр Хөсәеновтан телеграмма килде. Әлеге телеграммада алар Татарстан Республикасын һәм “Ак Барс” командасы хоккейчыларын, клубның җитәкчелеге, тренерлары, техник персоналы һәм хезмәткәрләрен, барлык җанатарларны “Ак Барс” хоккей клубының Россия чемпионатында җиңүе белән котлый, дип хәбәр итә ТР Президентының матбугат хезмәте.
“Мәскәүнең бөтен татар җәмгыяте үзенең яраткан командасының уенын игътибар белән күзәтте, бары тик җиңү көтте, һәм ул килде. Команда лаеклы көндәш белән кыен һәм киеренке көрәштә җиңү яулады. Без сезне яратабыз, сезнең белән горурланабыз!”, – диелә телеграммада.