Миңнеханов «Татарстан-Үзбәкстан» эшлекле форумында катнашу өчен Ташкентка килде

Сәфәр кысаларында Президент татар иҗтимагый оешмалары вәкилләре белән дә очрашачак.

(Казан, 16 июнь, «Татар-информ»). Бүген Татарстан Президенты Рөстәм Миңнеханов Үзбәкстан Республикасына эш сәфәренә килде. Бу турыда республика Президентының матбугат хезмәте җитәкчесе Лилия Галимова хәбәр итте.

Ташкент халыкара аэропортында Рөстәм Миңнехановны Үзбәкстан Премьер-министры урынбасары, инвестицияләр һәм тышкы сәүдә министры Сардор Умурзаков һәм Россиянең Үзбәкстандагы Гадәттән тыш һәм Тулы вәкаләтле илчесе Олег Мальгинов каршы алды.

«Үзбәкстанда Рөстәм Миңнехановның „Татарстан-Үзбәкстан“ эшлекле форумында катнашуы, бизнес-даирәләр белән очрашу, „TEXNOPARK“ җәмгыятендә булу, Үзбәкстан җитәкчелеге дәрәҗәсендә „Россия — Ислам дөньясы“ стратегик караш төркеменең көн тәртибе буенча эшләү планлаштырылган. Сәфәр кысаларында Президент татар иҗтимагый оешмалары вәкилләре белән дә очрашачак», — диде Лилия Галимова.