Миңнеханов «Кольцо» үзәген түбәдә ял итү зонасы белән реконструкцияләүне хуплады
Проектта җир асты паркингы хисабына парковка урыннарын киңәйтү каралган.
(Казан, 15 июль, «Татар-информ»). Татарстан Президенты Рөстәм Миңнеханов «Кольцо» сәүдә үзәген реконструкцияләү проектын өйрәнде, тулаем алганда, ул концепцияне хуплады. Шул ук вакытта кайбер карарлар республика җитәкчесендә сораулар тудырды. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.
«Рөстәм Миңнеханов концепцияне хуплады, шул ук вакытта, башкала халкының объект белән нык кызыксынуын исәпкә алып, аңа, эшкә керешкәнче, тулы презентацияне тәкъдим итәргә кушты», — диде Галимова.
Ул ял итү зонасы һәм кафе урнашачак түбәне эксплуатацияләү проекты күз алдында тотыла, диде. Шулай ук , Галимова сүзләренчә, проектта җир асты парковкасы хисабына парковка урыннарын киңәйтү каралган.