Әлки районында Рөстәм Миңнехановка волонтерлык хәрәкәте үсеше турында сөйләделәр

(Казан, 15 апрель, «Татар-информ»). Әлки районына эш сәфәре вакытында Татарстан Президенты Рөстәм Миңнехановка муниципалитетта оештырылган волонтерлык хәрәкәте турында сөйләделәр. Бу хакта республика җитәкчесенең матбугат хезмәте хәбәр итә.

Район башлыгы Александр Никошин сүзләренчә, Covid-19 коронавирус инфекциясе таралу куркынычы шартларында битараф булмаган кешеләр өлкән яшьтәге һәм ялгыз яшәүче авыл халкына ярдәм итә, аларга азык-төлек һәм медикаментлар китерә.

Бер эшмәкәр волонтерларга 20 җиңел автомобиль бирде, дип өстәде муниципаль берәмлек җитәкчесе.

Әлки районы якташлык җәмгыяте рәисе — Казан кооператив институты ректоры Алсу Нәбиева якташлык җәмгыяте көче белән акча җыю оештырылуын әйтте. Күп балалы һәм аз керемле гаиләләрдә тәрбияләнүче балалар өчен азык-төлек җыелмалары алуга 200 мең сумнан артык акча тотылган.

«Бу бик дөрес һәм вакытлы инициатива. Бүгенге катлаулы шартларда гражданнарның бу категорияләре ярдәмгә мохтаҗ», — диде Рөстәм Миңнеханов.