Миңнеханов Биектауда бассейн ачуда катнашачак һәм яңа балалар бакчасы белән танышачак
340 урынлы балалар бакчасын август ахырында ачарга ниятлиләр.
(Казан, 13 август, «Татар-информ», Динара Прокопьева). Бүген Татарстан Президенты Рөстәм Миңнеханов эш сәфәре белән Биектау районына бара. Ул биредә йөзү бассейнын ачуда катнашачак һәм яңа балалар бакчасы белән танышачак. ТР Президенты җитәкчесе Лилия Галимова республика Министрлар Кабинетында узган брифингта шул хакта хәбәр итте.
«Рөстәм Миңнехановның Биектау районына эш сәфәре планлаштырылган. Бүген анда бассейн ачарга ниятлиләр. Бу – Биектау районындагы беренче шундый зур объект», - дип ачыклык кертте Галимова.
Яңа спорт корылмасы 500дән артык кешене кабул итәргә сәләтле. Балалар өчен махсус бассейн каралган, анда аларны йөзәргә өйрәтәчәкләр. Сәламәтлек мөмкинлекләре чикле кешеләр өчен дә уңайлы мохит тудырылган.
Биектаудагы балалар бакчасы 340 урынга исәпләнгән. Анда сөйләм, ишетү сәләте бозылган, ДЦП һәм аутизмнан интегүче сабыйлар өчен махсус төркемнәр булдырылачак. Мәктәпкәчә учреждениене август ахырында файдалануга тапшыру күздә тотыла.