Татарстан Президенты эш сәфәре белән - Чехиядә

(Казан, 10 май, «Татар-информ»). Бүген Татарстан Президенты Рөстәм Миңнеханов эш сәфәре белән Чехия Республикасына китте.

Әлеге илнең башкаласы Прагада ТР Президентының Чехия Президенты Милош Земан белән очрашуы ниятләнгән. Р.Миңнеханов Прагадагы Ольшан зиратындагы Совет сугышчылары мемориалына венок китерергә җыена.

Моннан тыш, Татарстан Президенты бизнес вәкилләре, Чехиянең кайбер компанияләре җитәкчеләре белән эшлекле очрашулар һәм сөйләшүләр үткәрергә тиеш.

Р.Миңнехановның Чехиягә эш сәфәре 12 майга кадәр дәвам итәчәк, диелә ТР Президенты матбугат хезмәте хәбәрендә.  

12 майда исә ТР лидеры эш буенча Австриядә була, җирле татарлар белән дә очрашыр дип көтелә.