Рөстәм Миңнеханов татар посткроссинг сервисында теркәлде

ТР Президенты «Татмедиа» әдәби кафесы стендыннан өч открытка сайлап алды һәм хатлар җибәрү формасыннан файдаланды.

(Казан, 7 май, «Татар-информ»). Татарстан Президенты Рөстәм Миңнеханов татар посткроссинг платформасында - «Миллиард.Татар» сайты һәм бөтен дөнья буйлап креатив кәгазь открыткалар белән алмашу максатыннан булдырылган «Хатлар йорты» сервисының уртак проектында теркәлде.

ТР Президенты «Татмедиа» әдәби кафесы стендыннан өч открытка сайлап алды һәм хатлар җибәрү формасыннан файдаланды. Сайт открыткаларны өч адрес (Ереван, Актүбә һәм Казан) буенча җибәрергә тәкъдим итте.

Адресатлар Рөстәм Миңнеханов җибәргән открыткаларны почта аша алачак. Хәзер сервистан файдаланучыларның үз хатын шәхсән ТР Президентына җибәрү мөмкинлеге бар.