Рөстәм Миңнеханов губернатор-блогерлар рейтингында лидерлар исемлегендә

Татарстан Президенты берьюлы 4 баскычка күтәрелеп, 3 нче урынга менгән

 (Казан, 6 сентябрь, «Татар-информ»). “Медиалогия” мәгълүмат-аналитика системасы быел август аенда губернатор-блогерларга рейтингын бастырган. Татарстан Президенты Рөстәм Миңнеханов рейтинг нәтиҗәләре буенча берьюлы 4 баскычка күтәрелеп, әйдәп баручылар өчлегенә кергән.

Әлеге рейтингта Чечня башлыгы Рамзан Кадыйровны 1 баскычка түбән төшереп, Мәскәү мэры Сергей Собянин 1 нче урынга менгән. Шул рәвешле, Татарстан лидеры – 3 нче.”Татарстан Президенты Рөстәм Миңнеханов Instagramга Казан – Оренбург юлының Саескан Тавы турысында Кама аша салынган күпернең икенче чиратын ачу тантанасыннан видео урнаштырган. Шулай ук Рөстәм Миңнеханов Рамзан Кадыйровны чабышкысы Казанда ТР Президенты Кубогын отуы белән котлады”, - дип билгеләп үткәннәр рейтинг төзүчеләр.

Искәртеп үтәбез: губернатор-блогерларга сылтама-өземтә китерү рейтингына Россия төбәкләре башлыкларының үз блогларын алып баручылары гына керә. Рейтинг төзүдә “Медиалогия” сылтама-өземтә китерү индексы нигез булып тора.