Чирмешәндә полицейскийлар укытучылар һәм мәдәният хезмәткәрләре теккән битлекләр кия

Мәдәният хезмәткәрләре күп тапкыр кулланыла торган битлекләр тегеп, аларны әүвәл волонтерларга таратты.

(Чирмешән, 6 апрель, «Татар-информ», «Безнең Чирмешән», Гөлсирә Шәрифуллина). Чирмешән районының мәгариф һәм мәдәният оешмалары хезмәткәрләре тәүлек дәвамында диярлек эштә торучы полиция хезмәткәрләре өчен күп тапкыр кулланыла торган битлекләр тегеп бирделәр. Бу турыда район басмасы хәбәр итә.

— Бу эштә аеруча Туймәт мәктәбе уытучылары актив булдылар, — ди район мәгариф бүлеге начальнигы урынбасары Флера Рәхимҗанова. — Лашман мәктәбенең техник хезмәткәрләре дә байтак битлек тектеләр.

Шулай ук бүген Чирмешәннең беренче мәктәбе һәм Күтәмә мәктәбе, Чирмешән лицее коллективлары да битлекләр тегү белән мәшгуль.

Мәдәният хезмәткәрләре күп тапкыр кулланыла торган битлекләр тегеп, аларны әүвәл волонтерларга таратты. Ә бүген алар теккән битлекләрнең бер өлешен полиция хезмәткәрләренә тапшырдылар.

— Мин, барлык коллектив исеменнән, бу эштә катнашкан якташларыма рәхмәтемне җиткерәм, — ди район полиция бүлекчәсе начальнигы урынбасары Хәлил Шарапов.