news_header_top_970_100
16+
news_header_bot_970_100

Рөстәм Миңнеханов Казан Кремлендә күп балалы аналарга «Ана даны» медален тапшырды

«Безнең республика нык, тату, күп милләтле гаиләләр белән дан тота», — диде Президент.

Рөстәм Миңнеханов Казан Кремлендә күп балалы аналарга «Ана даны» медален тапшырды
Гөлнар Гарифуллина

(Казан, 5 март, «Татар-информ», Гөлнар Гарифуллина). Бүген Татарстан Президенты Рөстәм Миңнеханов Казан Кремлендә күп балалы аналарга «Ана даны» медален тапшырды.

«Иң матур язгы бәйрәм алдыннан „Ана даны“ медален тапшырабыз. Гаилә ул — җылылык, мәхәббәт учагы, һәркайсыбызга терәк. Гаилә һәрвакыт җәмгыятьнең рухи сәламәтлеген, милли-мәдәни йөзен саклаучы булды», — диде Рөстәм Миңнеханов. 

Президент Татарстанда гаиләләргә, яшь буынны тәрбияләүгә һәрвакыт лаеклы урын бирелгәнен билгеләп узды. «Безнең республика нык, тату, күп милләтле гаиләләр белән дан тота», — диде Рөстәм Миңнеханов. 

Ул былтыр 19 мең яңа гаилә барлыкка килгәнен әйтте. «Һәр алтынчы никах — катнаш гаилә. Туган балаларның яртысыннан артыгы гаиләдә икенче һәм аннан соңгы балалар. Барлыгы 61 процент тәшкил итәләр. Күп балалы гаиләләр артуы сөендерә. 1 гыйнварга 40 мең 320 күп балалы гаилә исәпләнә», — дип белдерде. 

Барлыгы 11 хатын-кыз «Ана даны» медаленә лаек булды.

autoscroll_news_right_240_400_1
autoscroll_news_right_240_400_2
news_bot_970_100