Рөстәм Миңнеханов Мәскәүдә ТАССРның 100 еллыгы уңаеннан медальләр тапшырды
Президент бүләкләнүчеләргә Татарстанга ярдәм итүләре һәм төбәкнең социаль-икътисади үсешенә зур өлеш кертүләре өчен рәхмәт белдерде.
(Казан, 5 февраль, «Татар-информ»). Татарстан Президенты Рөстәм Миңнеханов Мәскәүдә Татарстан Республикасының Россия Федерациясендәге Тулы вәкаләтле вәкиллегендә булды, анда ТАССР йөзьеллыгы уңаеннан медальләр тапшырды. Бу хакта республика җитәкчесенең матбугат хезмәте хәбәр итә.
«Без партнерларыбызны, дусларыбызны, хезмәттәшләребезне, якташларыбызны югары бәялибез. Шул исәптән сезнең ярдәм белән Татарстан үсеш динамикасына ия», - диде Рөстәм Миңнеханов.
Бүләкләрне Россия Хисап палатасы аудиторы, икътисад фәннәре докторы Юрий Воронин, Пирогов исемендәге Россия илкүләм тикшеренү медицина университеты ректоры каршындагы киңәшче Александр Царегородцев һәм оборона ведомстволары вәкилләре алды.