Рәсми Татарстан 4 ноябрь 2021 11:28

Татарстан хакимияте эшләми торган көннәрне 7 ноябрьдән соң озайтмаска карар кылды

Шул ук вакытта республикада элегрәк кайбер объектлар эшенә кертелгән катгый чикләүләр һәм тыюлар, тамаша-күңел ачу һәм массакүләм чаралар үткәрүне тыюлар санитар-эпидемиологик хәл яхшырганчыга кадәр гамәлдә булачак.

Скопировать ссылку

(Казан, 4 ноябрь, «Татар-информ»). Татарстанда 7 ноябрьдән соң Covid-19 коронавирусы таралуны булдырмау өчен кертелгән эшләми торган көннәр режимы дәвам ителмәячәк. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.

«Республиканың оператив штабы Татарстан Президенты Рөстәм Миңнехановка эпидемиология вазгыяте турында хәбәр итте. Доклад нәтиҗәләре буенча эшләми торган көннәр режимын 8 ноябрьдән озайтмаска дигән карар кабул ителде», — дип аңлатты агентлык әңгәмәдәше.

Шул ук вакытта Галимова республикада элегрәк кертелгән «кайбер объектлар эшенә катгый чикләүләр һәм тыюлар, тамаша-күңел ачу һәм массакүләм чаралар үткәрүне тыюлар» санитар-эпидемиологик хәл яхшырганчыга кадәр гамәлдә булачагын искәртте.

Моннан тыш, Татарстан Республикасы Президенты матбугат хезмәте җитәкчесе коронавирус вазгыятенә бәйле рәвештә өстәмә чикләү чаралары кертелергә мөмкин, дип өстәде. «Аларның исемлеге хәзер Татарстан Республикасы Хөкүмәте каравында » - дип аңлатты ул.

Элегрәк РФ Президенты Владимир Путин, Covid-19 коронавирусы таралу темпларын киметү өчен, хезмәт хакын саклап калып, бөтен ил буенча эшләми торган көннәр режимын керткән иде. Дәүләт башлыгы төбәк җитәкчеләренә агымдагы эпидемиологик вазгыятьтән чыгып, эшләми торган көннәр режимын мөстәкыйль рәвештә озайту хокукын бирде. Мәскәү һәм Мәскәү өлкәсе әлегә бу адымга барырга җыенмый. Федераль дәрәҗәдә дә яңа карарлар әлегә юк.

Сәхифәләр

Татарстан хакимияте эшләми торган көннәрне 7 ноябрьдән соң озайтмаска карар кылды