Зилә Вәлиева: Яңа Министрлар Кабинетыннан барлык өлкәләргә дә игътибар таләп ителә
Республика Иҗтимагый палатасы рәисе, Хөкүмәтнең яңа составы алдында Covid-19 пандемиясе сәбәпле кузгатылган оператив бурычлар күп, дип саный.
(Казан, 1 октябрь, «Татар-информ», Динара Прокопьева). Татарстанның яңартылган Министрлар Кабинеты — ул мобиль команда, коронавирус пандемиясе шартларында аннан барлык өлкәләр игътибар таләп ителә. «Татар-информ» хәбәрчесе белән сөйләшкәндә республика Иҗтимагый палатасы рәисе Зилә Вәлиева шундый фикер белдерде.
«Хәзер хөкүмәт барлык өлкәләргә дә зур игътибар таләп ителгән шартларда эшли. Барысына да диярлек конкрет ярдәм кирәк. Бу вазгыятьтә, әлбәттә, профессиональлек дәрәҗәсе бик мөһим. Безнең команда мобиль, һәм ул алдагы тәҗрибә белән шундый бурычларга әзерләнгән. Шуңа күрә аңа җитди өметләр баглап, уңышлар теләргә мөмкин», — диде агентлык әңгәмәдәше.
Аның фикеренчә, ТР Министрлар Кабинетының яңартылган составына хәл итәсе бурычлар пандемия шартларында формалаша. Нигездә, ул үз өстенә җаваплылык алуны һәм адекват чаралар күрергә әзер булуын күрсәтте инде.
«Барлык һөнәри осталык үз-үзенә ярдәм итә алмаган кешеләрне яклауда кыенлыкларны киметү һәм шул ук вакытта нәтиҗәле эшләүчеләр өчен шартлар тудыру өчен кулланылыр дип өметләнәм. Шуның аркасында без республикада тотрыклылыкны саклап кала алабыз. Бүген хәл итәсе оператив бурычлар бик күп. Әмма безнең команда мобиль, без аңа ышанабыз һәм аңа өметләнәбез», — диде Вәлиева.
Кичә Татарстан Хөкүмәтенең өлешчә яңартылуы турында билгеле булды. Үзгәрешләр республиканың Мәгариф министрлыгына гына кагылды. Рафис Борһанов урынына аны Илсур Һадиуллин җитәкли.
«Мин моны Мәгариф министрлыгында зур үзгәреш дип атамас идем, чөнки министрлыкта анда эшләгән кеше кала. Хәер, әлбәттә, министрлыкның беренче заты булу һәм барлык кабул ителгән карарлар өчен җавап бирү — бу күпкә авыррак җаваплылык йөкли. Гомумән, Илсур Гәрәевичның элекке биографиясе әлеге эш дәрәҗәсенә әзерлек ул», — дип саный Вәлиева.