Дәүләт-хосусый партнерлык механизмнары әлегә Татарстанда киң таралыш тапмады – Р. Миннеханов

(Казан, 1 март, “Татар-информ”). Бүген Татарстан Республикасының Инвестицион совет әгъзалары дәүләт-хосусый партнерлык механизмнары һәм республикада дәүләт-хосусый партнерлык шартларында гамәлгә аша алырлык инвестицион проектлар турында фикер алышты. Инвестицион совет утырышы ТР Хөкүмәте йортында узды, дип ТР Президентының матбугат хезмәте хәбәр итә.

“Бүген дәүләт-хосусый партнерлык шартларында проектларны гамәлгә ашыруга потенциаль инвесторларны җәлеп итү мөһим”, - диде Рөстәм Миңнеханов утырышны ачып.

Республикада дәүләт һәм хосусый бизнесның уңышлы хезмәттәшлегенә мисаллар инде бар. Бу, шул исәптән - “Алабуга” МИЗ, “Иннополис” МИЗ территориясендәге проектлар, “ТАНЕКО” һәм “Аммоний” инвестицион проектлары.

Рөстәм Миңнеханов искәртеп узганча, әлегә дәүләт-хосусый партнерлык кысаларында эшчәнлекне көйли торган федераль дәрәҗәдәге законнар юк. Күп кенә субъектлар төбәк дәрәҗәсендә үз закон чыгару актларын кабул иткән. Татарстанда дәүләт-хосусый партнерлык турындагы закон 2011 нче елның җәендә кабул ителгән.

“Дәүләт-хосусый партнерлыкта мөһим рольне концессия уйный”, - дип ассызыклады Рөстәм Миңнеханов. Ул утырышта катнашучылар игътибарын әлегә республикада дәүләт-хосусый партнерлык механизмнары Татарстанда киң таралмаганлыгына юнәлтте. Соңгы тугыз елда нибары өч концессион килешү төзелгән.