Нурлат районының яшь урманчылары агачтан шахмат сыннары ясаган
Шахматны "Нурлат урманчылыгы" музеена тапшырганнар.
(Казан, 10 июнь, “Татар-информ”). Нурлаттагы мәктәп урманчылыгы гимназиясенең 6нчы сыйныф укучылары ел саен сыерчык оялары һәм җимлекләр ясап элә. Укучылар Нурлат урманчылыгы хезмәткәрләре белән бергә урман хуҗалыгы эшләрендә дә актив катнашалар. Бу хакта Татарстан Урман хуҗалыгы министрлыгы матбугат хезмәте хәбәр итә.
Технология укытучысы, мәктәп урманчылыгы җитәкчесе Фәниз Гаязов җитәкчелегендә балалар, агачтан 32 шахмат сыны ясап, “Нурлат урманчылыгы” музеена тапшырганнар.
Укучылар Нурлат урманчылыгы хезмәткәрләре белән бергә урман хуҗалыгы эшләрендә актив катнашалар. “Нурлат хуҗалыгы” җитәкчесе – урманчы Рөстәм Галиев мәктәп урманчылыгы эшчәнлегенә бар яклап ярдәм күрсәтә, диелә матбугат хәбәрендә.