Мәдәният 5 ноябрь 2009 14:16

Нурлат районы Казанга тамашага чакыра

Нурлатлылар әзерләгән кичәне тамаша кылырга теләгәннәр өчен керү ирекле

Скопировать ссылку

(Казан, 5 ноябрь, «Татар-информ»). 13 ноябрь көнне сәгать кичке 6да Г.Тукай исемендәге Татар дәүләт филармониясендә (Казан шәһәре, Павлюхин ур., 73) Нурлат районы үзешчәннәре әзерләгән тамаша башланачак.

Нурлатның 100 еллыгы һәм авыл хуҗалыгы эшләренә йомгак ясау уңаеннан әзерләнгән әлеге чарада тәкъдим ителәчәк фильмда төбәкнең данлы үткәне, бүгенгесе чагылдырыла, районның уңган хезмәтчәннәре, булдыклы җитәкчеләре хакында сүз була. Казанга район хакимияте башлыгы Наил Шәрәпов рәислегендә киләчәк делегация дә шул хакта сөйләргә җыена. Аларның чыгышлары районның аерым сәнгать осталары һәм иҗат коллективлары җыр-биюләре белән үрелеп барачак.

Бу вакыйга турында «Татар-информ» агентлыгына Казандагы Нурлат якташлыгы рәисе ярдәмчесе Айрат Әюпов хәбәр итә. Аның сүзләренчә, Нурлатлылар әзерләгән кичәне тамаша кылырга теләгәннәр өчен керү ирекле.

Сәхифәләр

Нурлат районы Казанга тамашага чакыра