Новосибирскида Өлкә татар үзәге директоры Рауза Тихомированы юбилее белән котладылар
Новосибирск шәһәренең Заволокин исемендәге Милли мәдәниятләр йортында 29 мартта «Язгы очрашу» дип аталган концерт оештырылды. Ул Татарстан Республикасының атказанган мәдәният хезмәткәре, «Новосибирск өлкә татар үзәге» оешмасы директоры Рауза Тихомированың юбилеена багышланды, дип яза «Новосибирские татары».
Фото: "Новосибирские татары"
50 елдан артык гомерен милли мәдәниятне саклау һәм үстерүгә багышлаган Роза ханымга котлауларын Новосибирск өлкәсе губернаторы Андрей Травников, Дәүләт Думасы депутаты Олег Иванинский, өлкә җитәкчесе урынбасарлары, өлкәнең мәдәният министры, шулай ук Татарстан Республикасының мәдәният министры Ирада Әюпова һәм башка рәсми затлар юллаган.
Сәхнәдә Татарстаннан кунак, Бөтендөнья татар конгрессы вәкиле буларак, Татарстанның атказанган артисткасы, җырчы Альбина Апанаева чыгыш ясаган.
Рауза Тихомирова Новосибирск өлкәсе парламентының Мактау грамотасы һәм шәһәр мэриясенең Мактау грамотасы белән бүләкләнгән.
Юбилярны котларга төбәкләрдән татар милли оешмалары вәкилләре килгән. Алар арасында - Томскидан татар мәдәнияте үзәгенең сәнгать җитәкчесе Татьяна Семенова һәм үзәк методисты Камил Аплин, Красноярск краеның Татар автономиясе рәисе Вәгыйз Фәйзуллин, Чан районы башлыгының беренче урынбасары Рәшит Ибраһимов, «Ак калфак» хатын-кызлар оешмасы җитәкчесе Алиса Тимеркаева, Колыван районыннан «Ак калфак» хатын-кызлар оешмасы җитәкчесе, Ватан сугышчылары гаиләләре комитеты әгъзасы Нәсимә Бабкина булган.