Новосибирск өлкәсендә «Себер сандыгы» унынчы татар сменасы старт алды
30 июльдә Новосибирск өлкәсенең Тогучинск районы Мирный бистәсендә балалар өчен «Себер сандыгы» дип аталган унынчы татар профильле сменасын ачу тантанасы булды. Бу хакта Бөтендөнья татар конгрессы матбугат хезмәте хәбәр итә.
Смена «Яшел йорт» туркомплексы базасында уза, 40 тан артык катнашучыны бай мәдәни һәм белем бирү программасы көтә. Бу уникаль проект, ул балаларны себер татарларының бай этномәдәни мирасына җәлеп итүгә, туган телгә, тарихка һәм гореф-гадәтләргә кызыксынуны үстерүгә юнәлдерелгән.
Лагерьның беренче көннәреннән үк татар мәдәнияте белән чын күңелдән кызыксыну, дуслык атмосферасы хөкем сөрә. Оештыручылар билгеләп үткәнчә, «Себер сандыгы» сменасы балаларга яңа белемнәр генә биреп калмый, ә аларда тотрыклы милли үзаң хисе формалаштыра, бу күпмилләтле төбәк шартларында аеруча мөһим.