Нөнәгәр волонтерлары махсус операциядә катнашучыларга коры ашлар әзерләүләрен сөйләде

Скопировать ссылку

Балтач районының Нөнәгәр авыл җирлеге волонтерлары махсус хәрби операциядә катнашучы хәрбиләргә коры ашлар әзерләп җибәрә. Бу хакта алар «Җиңү армиясенә кушыл!» телемарафонында сөйләде.

«Кызыбыз Финзия Саба районында коры ашлар әзерләгәннәрен күргән. «Әни, без дә эшли алмабыз микән», - диде. Ятып калганчы атып кал, дидек тә, эшкә тотындык. Киптергеч сатып алдык. Кышын запасларыбыз күп иде: чөгендер, бәрәңге, кишер, суганнар. Шулардан коры ашлар ясый башладык. Үзебезнең запас беткәч, күрше авыл халкы китерә башлады. Без аларны баштан пешерәбез, чистартып, кыргычтан кырып, киптергечкә салабыз, аннары алып ваклыйбыз. Шул әйберләр әзер булгач, шактый җыелгач, үзебезнең авылдагы әби-апаларны чакырабыз. Алар безгә булышырга бик теләп килә», - дип сөйләде Фәридә Вафина.

Алар «Җиңү армиясенә кушыл!» телемарафонында коры ашларны әзерләп тә күрсәтте. «Аерым пакетларга бер порциялек итеп тутырабыз. Һәрберсен бертигез дәрәҗәдә үлчәп салабыз. Тәмле булсын өчен интернет кибеттән тәмләткечләр сатып алабыз», - дип аңлатты волонтерлар.

«Безнең белән махсус хәрби операциядә катнашкан егетләрнең әниләре дә аш тутырырга килә. Бисмиллаларны әйтеп тутырабыз. Егетләрнең хәлләрен сорыйбыз. Коры ашлар тәмле булсын дип тырышабыз. Контракт төзергә теләүче егетләр – нык ихтыярлы, батыр егетләр. Исән-сау булсыннар, үз гомерләрен куркыныч астына куеп йөриләр. Гомерләре бетмәсен дә, исән-сау җиңү белән әйләнеп кайтсыннар. Ә безнең ашлар гаиләләрен, өйләрен искә төшереп торсыннар иде», - диде Фәридә Вафина.

Мәүлия Бәхтиярова барлык хәрбиләрнең гаиләләре янына исән-сау булып кайтуларын теләде.

«Шушы ашларны ашап, өй җылысын тойсыннар иде. Бик тырышып, теләп булышабыз. Авырсынмыйбыз», - диде Люция Муллагалиева.

#махсус хәрби операция

Сәхифәләр

Нөнәгәр волонтерлары махсус операциядә катнашучыларга коры ашлар әзерләүләрен сөйләде