Татар дөньясы 19 март 2018 06:00

Нижгар татарлары “Аулак өй”гә җыелачак

Кич утыруда “Ак калфак”лылар киләчәк бәйрәмнәр турында фикер алышачак, мастер-класслар узачак һәм милли ашлар буенча ярышачак.

Скопировать ссылку

(Казан, 19 март, “Татар-информ”). Нижгар өлкәсенең “Ак калфак” хатын-кызлар оешмасы “Аулак өй”гә җыелачак. Бу хакта Бөтендөнья татар конгрессы сайты хәбәр итә. “Аулак өй” 21 мартта булачак.

Монда “Ак калфаклылар” алда торган бәйрәмнәрне оештыру буенча фикер алышачак. Әйтик, Нижгар татарлары 6 апрельдә “Әниемнең җылы кочагы” кичәсен уздырырга җыена. Шулай ук ел дәвамында “Нижгарбикә” конкурсын үткәрү дә күздә тотыла. Татар атрибутикасына һәм традициясенә кагылышлы башка бәйгеләр дә, мастер-класслар да уздыру планлаштырылган.

Кич утырганда “Ак калфак”лылар “Тәрбия баскычлары” видео дискының икенче бүлегенә кыкача күзәтү ясар, кул астындагы материаллардан чәчәкләр үрү буенча Роза ханым Хәйретдиновадан мастер-класс алыр дип тә ниятләнә. Шулай ук калфакны милли бизәкләр белән чигү буенча да мастер-класс булачак.

Соңыннан исә ханымнар үзләре әзерләп килгән милли ризыклар белән чәй эчәчәк. Иң тәмле һәм оригиналь ризыкка оештыручылар тарафыннан сувенир-бүләк каралган.

#Нижгар татарлары #Ак калфак #айлак өй

Сәхифәләр

Нижгар татарлары “Аулак өй”гә җыелачак