Нигъмәтуллин: Сабантуй – тынычлык һәм милләтара татулык символы

Бүген Дәрвишләр бистәсе Казанда Сабантуйны масштаблы бәйрәм итүнең бер мәйданы булды. Сабан бәйрәме кунакларын Татарстанның беренче вице-премьеры Рөстәм Нигъмәтуллин котлады, дип хәбәр итә Татарстан Республикасы Президентының матбугат хезмәте.

«Сабантуй – ул безнең милли байлыгыбыз. Ул тынычлык, милләтләр һәм конфессияләр арасындагы татулык символы. Сабан туе авылларда, район үзәкләрендә, республика шәһәрләрендә һәм Россия Федерациясе төбәкләрендә билгеләп үтелә. <...> Бу бәйрәмдә без барлык авыл хуҗалыгы хезмәтчәннәрен хөрмәтлибез – алар табыннарыбыз мул, һәрвакыт икмәк булсын өчен кулдан килгәнчә барысын да эшли. Авыр хезмәтләре өчен аларга баш иябез һәм зур рәхмәт белдерәбез!» – дип сөйләде Рөстәм Нигъмәтуллин.

Татарстан Республикасы Премьер-министрының беренче урынбасары быел Сабантуйның Россиядә 58 төбәктә узуын һәм 35 чит илдә оештырылуын әйтеп узды һәм кунакларга, катнашучыларга республика Президенты Рөстәм Миңнеханов исеменнән котлау сүзләрен җиткерде.

«Хөрмәтле татарстанлылар! Сезне чын күңелдән татар халкының иң яраткан һәм көтеп алынган бәйрәме – якты һәм күңелле Сабантуй белән котлыйм! Крестьян хезмәтенең, җитезлекнең һәм сәләтнең безгә борынгы ата-бабаларыбыз бүләк итеп калдырган искиткеч тантанасы җирнең уянуын, тыныч тормыш, татарларның юмарт кунакчыллыгын һәм ачык йөзен символлаштыра. Сабантуй батырларына, авыл хезмәтчәннәренә, зирәк аксакалларга һәм кыю батырларга чиксез рәхмәт белән карыйбыз», – диелә Татарстан җитәкчесе мөрәҗәгатендә.

Рөстәм Миңнеханов искә төшергәнчә, 2022 ел – Россия халыкларының мәдәни мирасы елы, Сабантуйга ул аерым мәгънә өсти. Шулай ук агымдагы елда Татарстан һәм бөтен Россиянең Идел буе Болгар дәүләтендә ислам динен кабул итүгә 1100 ел тулуны билгеләп үтүе дә мөһим, чөнки әлеге вакыйга татар мәдәнияте һәм гореф-гадәтләре үсешенә сизелерлек йогынты ясаган. Сабантуйлар кунакларга ата-бабаларыбызның гореф-гадәтләрен күрергә мөмкинлек бирә, дип ышана Татарстан Президенты.

Дәрвишләр бистәсендә, Аккош күленең урман-парк зонасында һәм Тынычлык бистәсендә бәйрәм кунакларын милли ишегаллары каршы алды. Аларда төрле уеннар һәм иҗади мастер-класслар, районнар продукциясе күргәзмәләре, кул эшләре ярминкәләре, халык күңел ачулары һәм спорт ярышлары оештырылды. Бәйрәм концертларында иң танылган башкаручылар буларак Ришат Төхвәтуллин һәм Эльмира Кәлимуллина чыгыш ясады.