“Әни, әнкәй, әнием” бәйгесендә беренче урынга Айсылу Лерон лаек булды
Шәһәр күләмендә узган бәйгедә Казан районнарында җиңү яулаган әниләр катнашты.
(Казан, 24 декабрь, “Татар-информ”, Зилә Мөбәрәкшина). Телевидение алып баручысы һәм журналист Айсылу Лерон Казанның 20нче гимназиясендә беренче тапкыр шәһәр күләмендә узган “Әни, әнкәй, әнием” бәйгесендә абсолют җиңү яулады. Бу хакта ул “Татар-информ” хәбәрчесенә үзе сөйләде.
Айсылу Лерон сүзләренчә, бәйгедә Казан районнарында җиңү яулаган әниләр катнашкан. “Барлыгы алты әни катнашты, кызганыч, җиденче әни авырып китте. Элек конкурс Совет районында гына узган булган”, - диде ул.
Конкурс биш этаптан торган. Яшь әниләргә визитка, бишек җырын җырлау, һөнәр күрсәтү, милли ризыкны тәкъдим итү, милли бию башкару кебек биремнәр бирелгән.
“Бу конкурска әзерләнгәндә бик дулкынландым, чөнки ул зур җаваплылык таләп итте. Улым Нурихан йөри торган Мәскәү районындагы “Балакай” бакчасын, шул райондагы икенче гимназиягә йөрүче кызым Фәридәнең мәктәбен якладым. Үзем генә түгел, гаиләбез белән әзерләндек”, - дип сөйләде Айсылу Лерон.
“Мин бу бәйгедә әни буларак балаларымны да сәхнәгә чыгардым, без җырладык, балалар шигырьләр дә сөйләде, алар өчен дә бу бәйге тәҗрибә булды”, - диде җиңүче.