«Наше время – Безнең заман» фестивале халыкара дәрәҗәдә үткәреләчәк
Эшләүче яшьләрнең ел саен үткәрелә торган «Наше время – Безнең заман» ачык республика телевизион иҗат фестивален халыкара дәрәҗәгә чыгарачаклар. Агымдагы елда ук финал өлешендә БДБ илләре предприятиеләре хезмәткәрләренең катнашуы планлаштырылган. Бу хакта «Татар-информ» да узган матбугат конференциясендә РФ Хөкүмәтенең мәдәният өлкәсендәге премиясе лауреаты, Татарстан һәм Кырымның атказанган сәнгать эшлеклесе, РФ мактаулы остазы, фестивальнең генераль продюсеры Дмитрий Туманов белдерде.
«Татарстан Рәисе Рөстәм Миңнеханов фестиваль халыкара булырга тиеш дигән карар кабул итте. Без БДБ илләре предприятиеләре белән сөйләшүләр алып барабыз. Әлегә сүз быел финал этабында катнашу турында бара», - дип билгеләде спикер.
Әмма киләсе елга зуррак планнар бар, дип ассызыклады Туманов. Фестивальнең барлык этапларында катнашу өчен Россиянең төрле төбәкләреннән предприятиеләрне чакыру гына түгел, ә сайлап алу этапларын берничә илдә уздыру да күздә тотыла.