Казандагы шахмат мәктәбе бинасын реставрацияләүгә 254 миллион сум акча юнәлдереләчәк
Казанда революциягә кадәр төзелгән бинада (Бутлеров урамы, 7) зур реставрация үткәрергә ниятлиләр – анда 1989 елдан шахмат мәктәбе һәм Татарстан Шахмат федерациясе урнашкан. Дәүләт сатып алулары порталында урнаштырылган документларга караганда, эшләрнең гомуми бәясе 254,1 миллион сум тәшкил итәчәк.
Биредә архитектор Михаил Григорьев проекты буенча 1913 елда төзелгән шәһәр училищесы бинасы турында бара. Үз тарихында объект уку йорты да, Бөек Ватан сугышы вакытында эвакуация госпитале дә булып торган.
Бүгенге көндә ул – кыйммәтле тарихи объект статусына ия булган эклектика стилендәге ике һәм өч катлы архитектурасы һәйкәле.
Заказчы бинаның тышкы күренешен саклау һәм югалган элементларны торгызу бурычын куя. Эш барышында декоратив кәрнизләр, парапетлар, металл рәшәткәләр һәм парапет баганаларын (һ.б.) тарихи үрнәкләр буенча яңадан торгызырга ниятлиләр.
Шулай ук эшчеләр көнбатыш фасадның декорын торгызырга, барлык фасадларны яңартырга, ә түбәне һәм инженерлык челтәрләрен модернизацияләяргә ниятли. Бина тирәсендәге территория дә тәртипкә китереләчәк.
Эшләрне башкаручы - Татарстан Республикасы Баш төзелеш идарәсе. Реставрацияне 2026 елның 1 декабренә кадәр төгәлләү планлаштырыла.