Нәзирә Фәттахова “Моабит дәфтәрләре”нең дистәгә якын булу ихтималын әйтте
Бүгенге көндә “Моабит дәфтәре”нең гарәп һәм латин графикасында язылган ике блокноты бар.
(Казан, 14 февраль, “Татар-информ”, Марат Мөбарәкшин). Муса Җәлилнең музей-фатир директоры Нәзирә Фәттахова “Моабит дәфтәре” буенча Мәскәү архивына барлыгы 9 дәфтәр тапшырылган булган дигән фикерне җиткерде. Бу турыда ул “Татар-информ” хәбәрчесенә әйтте.
“Дәфтәрләрнең саның төгәл генә әйтеп булмый. Истәлекләргә, документларга нигезләнсәк, “Моабит дәфтәре”нең саны икедән күбрәк булырга тиеш. 1946 елда Италиядә рус разведчигы Николай Горшковка 9 дәфтәр тапшырылган булган. Ул аларны Мәскәүгә җибәргән. Аларның анда килеп җитүе мәгълүм. Документларның кабул ителүе, кайда чыгулары теркәлгән. Алар немец архивына барып тоташа”, - диде Нәзирә Фәттахова.
Аның сүзләренчә, алар (“Моабит дәфтәре” – ТИ иск.) әлеге көнгә кадәр табылмаган. Без “Моабит дәфтәре”нең яңалары табылыр дип өметләнәбез. Ләкин архивларның бөтенесе дә әле ачык түгел.
- Бүгенге көндә “Моабит дәфтәре”нең гарәп һәм латин графикасында язылган ике блокноты бар. Анда 93 шигырь тупланган. Алар Милли музей фондында саклана.