«Мөхәммәдия» шәкертләре «Татарча диктант» язды
«Мөхәммәдия» мәдрәсәсе шәкертләре «Татарча диктант» Бөтендөнья акциясендә катнашты. Аны татар теле һәм әдәбияты укытучысы Гөлфинә Галиуллина мәдрәсәнең көндезге бүлегендә белем алучы 100 егеткә һәм кызга яздырды, дип хәбәр итә ТР Диния нәзарәте матбугат хезмәте.
Әлеге чара татар телен яратучыларны берләштерү, татар телендә хаталарсыз язарга өйрәнүгә кызыксыну уяту максатыннан оештырылды.
Диктантны язуда катнашучыларга катлаулылыгы буенча өч текст тәкъдим ителде. «Мөхәммәдия» мәдрәсәсе шәкертләре катлаулы вариантны сайлап, Шәриф Камалның «Матур туганда» романыннан өзек язды.
Искәртеп үтик, «Мөхәммәдия» мәдрәсәсендә татар телен өйрәнү өчен барлык шартлар тудырылган. Биредә шәкертләр өчен атнасына ике тапкыр татар теле, әдәбияты һәм татар халкы тарихы дәресләре үткәрелә. Алар шулай ук татар дин галимнәренең тарихын, иске имляда язылган хезмәтләрне, вәгазьләрне, кулъязмаларны өйрәнә.