Москалькова: Торак белән тәэмин итү өчен ташламадан файдаланучылар реестрын төзергә кирәк
Россиядә Кеше хокуклары буенча вәкаләтле вәкил Татьяна Москалькова, торак белән тәэмин итү өчен, гражданнарның ташламалардан файдаланучы категорияләренең бердәм реестрын булдырырга тәкъдим итте. Бу хакта РИА Новости агентлыгы хәбәр итә.
Ул билгеләп үткәнчә, ташламага ия гражданнарны торак белән тәэмин итү мәсьәләсе актуаль булып кала. Шул ук вакытта, аның сүзләренчә, әлегә кадәр категорияләрнең һәм аларга карый торган гражданнарның саны турында төгәл мәгълүматлар юк, бу ярдәм чараларын планлаштыруны катлауландыра.
Федерация Советының конституцион закон чыгару һәм дәүләт төзелеше комитеты утырышында чыгыш ясаганда, Москалькова ташламалардан файдаланучы барлык категорияләрнең бердәм реестрын булдыру бюджет акчаларын рациональ тотарга, өстенлекләр системасын булдырырга һәм торакны бүлгәндә кыйммәтләр шкаласын билгеләргә мөмкинлек бирер иде, дип билгеләп үтте.