“Мисс Татарстан” президенты Татарстан кызларын нинди яклары белән аерылып торуын әйтте
Изольда Сахарова фикеренчә, әлеге конкурста катнашып, кызлар камилләшә һәм тормышка өйрәнәләр.
(Казан, 28 гыйнвар, “Татар-информ”, Зилә Мөбәрәкшина). “Мисс Татарстан” иҗтимагый оешмасы президенты Изольда Сахарова Татарстан кызлары гүзәллекләре һәм ышанычлы булулары белән аерылып тора дип саный. Бу хакта ул “Татар-информ” уздырган матбугат конференциясендә әйтте.
“Егерме ел дәвамында безнең катнашучылар Халыкара конкурслардан Татарстанга һәм Россиягә күпсанлы җиңүләр алып кайтты. Шуңа күрә Татарстан кызлары чибәр дә һәм ышанычлы да”, - диде Изольда Сахарова.
“Мисс Татарстан – 2019” конкурсы ул – безнең мәктәбебез. Ул өч яшьлек балалардан алып яшүсмерләргә кадәр яшь буенча бүленеп, төрле юнәлешләрдә шөгыльләнә. Без матур булырга өйрәтәбез. Моннан тыш, укытуга этикет, сөйләм культурасы, стиль, җәмгыятьтә үз-үзеңне тоту һ.б. керә. Бу кагыйдәләрне кызларга гына түгел, егетләргә дә өйрәтәбез”, - диде ул.
“Мисс Татарстан” проекты матур кызларны җыеп, Татарстан сәхнәсеннән күрсәтү максатыннан түгел, ә тәрбияви максаттан оештырыла. Шуңа күрә дә безнең конкурска 14 яшьтән алып 23 яшькә кадәр кызларны катнашырга чакыралар”, - ди Изольда Сахарова.
- Җиңүчеләрнең киләсе этабы – “Мисс Россия” конкурсында катнашу.
- “Мисс Татарстан” титулын Казан кызы Ралина Арабова алды. Аңа 19 яшь, ул КДЭУда реклама һәм җәмәгатьчелек белән элемтәләр факультетында укый. Аның планнарында - «Мисс Россия» конкурсында катнашу һәм илнең 50 гүзәле исемлегенә керү.