Мирасханәдә иске татар текстларын кириллицага күчерә торган программа ясаганнар
«Miras-Tat» программасы ярдәмендә әлегә бары тик иске татар текстлары һәм басма материаллар белән эшләп була.
(Казан, 24 февраль, «Татар-информ», Рифат Каюмов). Галимҗан Ибраһимов исемендәге Тел, әдәбият һәм сәнгать институтының Язма һәм музыкаль мирас үзәгендә (Мирасханә) гарәп графикасындагы иске татар текстларын кириллицага күчерә торган программа ясаганнар.
«Мирасханәдә әзерләнгән „Miras-Tat“ программасы гарәп графикасында басылган татар матбугатын кириллицага күчерү эшен тизләтә. Бүген ул 70-73 процент текстны таный», — дип таныштырды Язма һәм музыкаль мирас үзәгенең әйдәп баручы фәнни хезмәткәре Азат Ахунов.
Мирасханәдә татар рухани мирасын җыю һәм саклауга багышланган түгәрәк өстәл утырышы узды. Әлеге чарада Мирасханә җитәкчесе Илһам Гомәров «Miras-Tat» программасы ярдәмендә әлегә бары тик иске татар текстлары һәм басма материаллар белән эшләп булуын әйтте. Кулъязмаларны һәм гарәп телен Татарстанда ясалган программа танымый.
«Бу программа ярдәмендә басма текстлар белән эшләргә мөмкин. Башта китап яисә журнал бите цифрлаштырылып, программага йөкләтелә. Аннары программа рәсем рәвешендәге биттән язуны аерып ала да, текстны кирилл графикасына күчерә. Аны шулай ук редакцияләргә дә була», — диде Мирасханә җитәкчесе Илһам Гомәров.
Мирасханә җитәкчесе сүзләренчә, программаның нәтиҗәлеген 90-95 процентка кадәр җиткерергә мөмкин икән. Аны ахырга кадәр эшләп бетергәннән соң, киң җәмәгатьчелеккә тәкъдим итәргә җыеналар. «Программаны сораучылар бар», — диде Илһам Гомәров.
Мирасханәдә узган түгәрәк өстәл утырышында кунакларны оешманың эшчәнлеге белән дә таныштырдылар.
«Без халыкның иң кыйммәтле язма һәм музыкаль мирасын туплау, саклау, халыкка чыгару белән максатчан шөгыльләнәбез. Татар халкының иң затлы мирасы Мирасханәдә тупланган. Габдулла Тукай, Галимҗан Ибраһимов, Шиһабетдин Мәрҗани һәм башка күренекле шәхесләрнең кулъязмалары, фотолары, документлары бездә саклана», — диде Азат Ахунов.
Мирасханәдә гарәп, фарсы, борынгы татар телендә язылган ун меңләп кулъязма, мәдәният, сәнгать һәм фән белән бәйле мәшһүр татарларның шәхси архивлары саклана. Барлыгы биредә илле меңнән артык архив берәмлеге тупланган.
«Мирасханәдә соңгы берничә елда дүрт меңнән артык кулъязма, үткән гасыр башында нәшер ителгән газета-журналлар цифрлы форматка күчерелде. Алар Miras.info порталына урнаштырыла бара. Без бөтен булган мирасны бернинди чикләүләрсез халыкка чыгарырга тырышабыз. Теләгән кеше үзенә йөкли ала», — диде Азат Ахунов.
