Минзәләдә “Опель” автомобиле юл кырыена төшеп, яна башлаган
Бүген иртән Иске Маҗын торак пункты янындагы юлда ике җиңел машина кара-каршы бәрелешкән.
(Казан, 6 июль, “Татар-информ”). Минзәлә районында “Опель” автомобиле юл кырыена төшеп, яна башлаган. Бу хакта “Татар-информ”га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
Иске Маҗын торак пункты янындагы юлда ике җиңел машина белән юл-транспорт һәлакәте турындагы хәбәр ашыгыч хезмәтнең 112 бердәм номерына бүген иртән килгән.
Авария иртәнге 6 сәгатьтә булган. Ике полосалы юлда 31 яшьлек ир-ат идарәсендәге “Лада Калина” һәм 24 яшьлек егет идарәсендәге “Опель Астра” кара-каршы бәрелешкән. Каты бәрелешү аркасында “Опель” юл кырыена төшеп, яна башлаган.
Һәлакәт урынына килгән 112 нче янгын сүндерү-коткару часте хезмәткәрләре 10 минутта янгынны сүндергәннәр.
Һәлакәттә зыян күрүчеләр юк.