Минзәләдә Мактау тактасын үзара салым акчасына куйганнар
Мактау тактасына фотолар урнаштырыла башлады.
(Минзәлә, 3 июнь, "Татар-информ", "Минзәлә", Наталия Клементьева). Минзәлә районында М.Җәлил исемендәге паркта салым акчасына куелган Мактау тактасына фотолар урнаштырыла башлады. Бу турыда җирле басма хәбәр итә.
Җыеннарда, референдумнарда халыкның фикерен истә тотып, шәһәр халкыннан җыелган үзара салым акчасының бер өлешенә М.Җәлил исемендәге паркта да байтак эшләр башкарылган.
2017 елгы үзара салым акчасына биредә М.Җәлил һәйкәле яңартылды, уен комплексы, яңа өйләнешүчеләр өчен арт-объектлар, гашыйклар өчен аркалар урнаштырылды. Болар өчен 4,9 млн сум үзара салым акчасы тотылды.
2018 елгы үзара салым акчаларының бер өлешенә парктагы Ленин һәйкәленә реконструкция үткәрелде. Моңа 1 млн сум үзара салым акчасы юнәлтелде. Аның янәшәсендәге Мактау тактасы да үзара салым акчасына ясалды.
"Шушындый ук Мактау тактасы Ленин һәйкәленең уң ягында да булачак. Анысы җирле бюджет средстволарына ясалды, аны сабантуйлар үткәч кую планлаштырыла. Анда районыбыздагы 35 мактаулы гражданның фотоларын урнаштыру дәвам итәчәк", - диде шәһәр башлыгы урынбасары Роза Салдаева.