Татарстан Идел буе федераль округында хезмәт хакы күләме буенча әйдәп бара
Татарстан хезмәт хакы күләме буенча Идел буе федераль округы төбәкләре арасында әйдәп баручы позицияне били. ТР хезмәт, мәшгульлек һәм социаль яклау министры урынбасары Клара Таҗетдинова «Татар-информ» агентлыгына шул хакта хәбәр итте.
«Бүген төбәктә хезмәт хакы 87 мең сумнан артып китә. Мәгълүматлаштыру өлкәсендә ул – 132 мең, финанс эшчәнлегендә – 127 мең, файдалы казылмалар чыгару өлкәсендә – 121 мең, эшкәртү сәнәгатендә 114 мең тәшкил итә», – дип сөйләде ул.
Таҗетдинова сүзләренчә, сәнәгатьне алга таба цифрлаштыру ИТ-сектор һәм җитештерү арасында симбиоз барлыкка китерәчәк. Хезмәт базарында цифрлы компетенцияле, җитештерүнең нечкәлекләрен аңларга гына түгел, ә заманча цифрлы алымнарны да кулланырга сәләтле инженерларга ихтыяҗ булачак.
«Бездә күп нәрсә автоматлаштыру һәм роботлаштыру, зур мәгълүматлар, ясалма фәһем белән эшләүгә бәйле булачак. Киләчәктә шул исәптән ИТ-технологияләрне дә яхшы белгән югары квалификацияле инженерга ИТ-белгечкә караганда югарырак хезмәт хакы түләргә мөмкиннәр», - дип өстәде Таҗетдинова.