Җәмгыять 29 ноябрь 2018 11:44

Минтимер Шәймиев хатыны вафат булу сәбәпле кайгы уртаклашучыларга рәхмәт белдерде

Минтимер Шәймиев гаиләсе өчен авыр вакытта игътибар һәм ярдәм күрсәтүчеләргә рәхмәт белдерде, шулай ук һәркемгә сәламәтлек һәм иминлек теләде.

Скопировать ссылку

(Казан, 29 ноябрь, «Татар-информ»). Республиканың беренче Президенты, Татарстан Дәүләт киңәшчесе Минтимер Шәймиев хәләл җефете Сәкинә Шәймиева вафат булу сәбәпле кайгы уртаклашучыларга рәхмәт белдерде. Аның мөрәҗәгате рәсми порталда дөнья күргән.

«Гаиләбез өчен кайгылы көннәрдә без Сәкинә Шакировнаның вафат булуына бәйле рәвештә йөзләгән кайгы уртаклашу телеграммасы алдык. Аларны республиканың барлык районнарыннан, Россия Федерациясенең күп кенә почмакларыннан, якын һәм ерак чит илләрдән гаиләбез белән таныш һәм шәхсән таныш булмаган кешеләр юллады», - диелә ТР Дәүләт киңәшчесенең мөрәҗәгатендә.

Минтимер Шәймиев шулай ук гаммәви мәгълүмат чаралары һәм социаль челтәрләрдә дә аның хәләл җефете турында күп кенә эчкерсез сүзләр әйтелүен искәртте.

«Ул кешеләрне яратты, изге гамәлләр кылырга омтылды һәм татарстанлылар тарафыннан үзенә карата күрсәтелгән җылы мөнәсәбәтне бик югары бәяләде», - дип искәртте Татарстанның беренче Президенты.

Сәкинә Шәймиева 16 ноябрьдә дөньядан китте. Ул озакка сузылган авырудан соң 80нче яшендә вафат булды.

#Минтимер Шәймиев #Сәкинә Шәймиева

Сәхифәләр

Минтимер Шәймиев хатыны вафат булу сәбәпле кайгы уртаклашучыларга рәхмәт белдерде