Җәмгыять 4 ноябрь 2022 09:35

Минтимер Шәймиев: Сынаулар һәрвакыт булачак, әмма без бердәм булырга тиеш

Скопировать ссылку

Казанда Татарстан халыклары ассамблеясы советының оешуына 30 ел тулуга һәм Халыклар бердәмлеге көненә багышланган киңәйтелгән утырыш узды. Анда республиканың Дәүләт Киңәшчесе Минтимер Шәймиев катнашты.

«Без сезнең белән тарихи вакыйгаларның тере шаһитлары булып торабыз. Без бик күп эшләр аша үттек, күп нәрсәне аңларга туры килде, һәм без икенче төрле булдык. Әмма узган еллар безне яхшы якка үзгәртте. Һәм нәтиҗә ясарга вакыт җитте», - диде утырышта катнашучыларга Татарстанның беренче Президенты.

Минтимер Шәймиев сүзләренчә, вакыт республиканың дөрес юл сайлавын күрсәтте, һәм хәзер киләчәк үсеш өчен күп мөмкинлекләр бар. «Иң мөһиме, үскәндә, без яхшы якка үзгәрәбез. Без дуслыкта һәм үзара аңлашуда ничек яшәргә икәнен аңлыйбыз, бер-беребезгә хөрмәт белән карыйбыз», - диде ул.

Дәүләт Киңәшчесе ассызыклаганча, шул исәптән төрле милләт кешеләрен берләштергән Татарстан халыклары ассамблеясы мисалында туган телләрен саклау эше алып барыла. «Туган тел - ул безнең мирас. Һәм мирасны саклау өстендә эшне нәкъ менә туган телдән башларга кирәк. Һәм монда без үзара аңлашу табабыз, шартлар тудырыла. Бу безгә иртәгесе көнгә тагын да күбрәк ышаныч бирә», - дип өстәде ул.

Шәймиев фикеренчә, Россия яши торган катлаулы шартларга карамастан, рухи көчне сакларга кирәк. «Сынаулар һәрвакыт булачак, әмма без бердәм булырга тиеш. Россиянең көч туплавы күпләргә ошамый. Ә безнең күпмилләтле илебезнең мөмкинлекләре зур. Без - көчле», - дип йомгаклады ул.

Утырыш азагында Минтимер Шәймиев Татарстан халыклары ассамблеясының «Халыклар бердәмлеген саклап калу һәм ныгыту өчен» күкрәк билгесе белән бүләкләнде.

Форум башланыр алдыннан чарада катнашучылар «Татарстан Халыклары ассамблеясы: тарих һәм хәзерге заман» фотокүргәзмәсендә булды, ул Халыклар дуслыгы йортының күргәзмә залында ачылды.

Сәхифәләр

Минтимер Шәймиев: Сынаулар һәрвакыт булачак, әмма без бердәм булырга тиеш