Рөстәм Миңнеханов Татарстанда Ураза бәйрәмендә иминлекне көчәйтергә кушты

Татарстан Рәисе Рөстәм Миңнеханов республика Хөкүмәте йортында узган киңәшмәдә берничә йөкләмә бирде. Очрашу Татарстанның барлык муниципаль районнары катнашында видеоконференция форматында узды, дип хәбәр итә ТР Рәисе матбугат хезмәте.

Миңнеханов искәрткәнчә, киләсе җомгада, 20 мартта, мөселманнар Ураза бәйрәмен билгеләп үтәчәк. Бу көнне дин тотучыларның күбесе мәчетләргә һәм башка дини учреждениеләргә бара. Шуңа бәйле рәвештә, муниципаль берәмлекләр башлыкларына һәм ТР мөселманнары Диния нәзарәте мөхтәсибләренә, хокук саклау органнары белән берлектә, бәйрәм намазлары вакытында җәмәгать тәртибен һәм иминлекне тәэмин итәргә кушылды.

Алда торган дата – 18 март (ул көнне илдә Кырымның Россия белән кушылуының 12 еллыгы билгеләп үтелә) - киңәшмәнең тагын бер темасы булды. Миңнеханов билгеләп үткәнчә, Кырым язы буларак билгеле вакыйгалар дөньяга Россиянең үз гражданнарын һәм тарихи дөреслекне яклавын күрсәтте. Аның сүзләренчә, бу дата илнең бердәмлеген сакларга, тарихны хөрмәт итәргә һәм дәүләтнең киләчәге турында уйларга кирәклеген искәртә.

Республика Рәисе шулай ук Татарстан белән Кырым, шулай ук Севастополь арасында хезмәттәшлек җайга салынуын билгеләп үтте. Шул исәптән Бакчасарай районы белән дә гуманитар һәм мәдәни элемтәләр үсеш кичерә. Алда торган дата уңаеннан Миңнеханов хакимият органнарына урыннарда тематик чаралар оештырырга кушты. Ул билгеләп үткәнчә, республика Кырым һәм Севастополь җитәкчелеге белән актив элемтәдә тора һәм уртак эшне дәвам итәргә ниятли.

Хайваннарда таралган авыруларга бәйле вазгыять киңәшмәнең тагын бер мөһим темасы булды. Миңнеханов хәбәр иткәнчә, Ветеринар һәм фитосанитар күзәтчелек федераль хезмәте (Россельхознадзор) белешмәләре буенча, илнең 15 төбәгендә, шул исәптән Удмуртия һәм Чувашиядә терлекләрдә төрле инфекцияләр ачыкланган. Бу төбәкләрдә терлекләрне бер урыннан икенче урынга күчерү һәм продукция ташуга чикләүләр кертелгән.

Шуңа бәйле рәвештә, Татарстан Рәисе республикага куркыныч инфекцияләр кертүне булдырмау чараларын көчәйтергә кушты. Аның сүзләренчә, терлекләр һәм продукцияне рөхсәтсез кертүгә чик куярга кирәк. Баш ветеринария, Россельхознадзор идарәсе һәм ТР буенча Эчке эшләр министрлыгы юл-патруль хезмәтенең стационар һәм күчмә постларына контрольне көчәйтергә тиеш, диде ТР Рәисе.

Моннан тыш, ТР Авыл хуҗалыгы һәм азык-төлек министрлыгына, муниципалитет башлыкларына һәм авыл хуҗалыгы предприятиеләре җитәкчеләренә фермаларда терлекләрне асрауның ябык режимын тәэмин итәргә, дезинфекция үткәрергә һәм мондый объектларга чит кешеләрнең керүен чикләргә кушылды.