Миңнеханов Ягулык-энергетика тармагын 2050 елга кадәр үстерү стратегиясе эшендә катнашты
Татарстан Рәисе Рөстәм Миңнеханов Мәскәүдә 2050 елга кадәр нефть һәм күмер тармагын үстерүгә багышланган стратегик сессиядә катнашты. Төп юнәлешләрнең берсе технологик суверенитетны ныгыту булды. Бу хакта Россия Хөкүмәте матбугат хезмәтендә хәбәр иттеләр.
Хөкүмәт «Атом һәм энергетика технологияләре» яңа илкүләм проектын эшләтеп җибәрде, ул үзебезнең алдынгы эшләнмәләргә, заманча материалларга, җиһазларга һәм комплектлаучы әйберләргә ярдәм итү өчен каралган.
Стратегиядә нефть тармагына аерым игътибар бирелгән, аның өлешенә илнең тулаем эчке продуктының 20 процентка якыны туры килә. Бу секторга еллык инвестицияләр, катнаш өлкәләрне үстерүгә ярдәм итеп, 5 трлн сумнан артып китә.
Россиядә нефтьне тирәнтен эшкәртү продукциясенә һәм нефть химиясенә конкурент бәяләр саклана, бу аны башка илләрдән отышлы аерып тора. Хөкүмәт башлыгы бу вазгыятьне даими контрольдә тотуның мөһимлеген ассызыклады.
Киләчәктә авыр чыгарыла торган нефть запаслары белән актив эш алып барырга һәм яңа төбәкләрдә табышны киңәйтергә кирәк булачак.
«Россия дөнья нефть базарының 10 процентын алып тора. Без ОПЕК+ буенча партнерлар белән тыгыз элемтәдә торабыз һәм глобаль энергетик иминлек мәсьәләләренә җаваплы карыйбыз», – диде РФ Хөкүмәте рәисе Михаил Мишустин.
Хөкүмәт шулай ук күмер тармагын үстерүне дәвам итәчәк. Өстенлекле бурычлар арасында логистиканы камилләштерү һәм транспортлауга чыгымнарны киметү бар. Бу юнәлештә Көнчыгыш тимер юл полигонының йөртү сәләтен арттыру, инфраструктураны киңәйтү, йөк күтәрүчәнлеге югары булган куәтле локомотивлар һәм инновацион вагоннар җитештерүне тизләтү планлаштырыла.
«Өстәмә механизмнарны эшләргә кирәк, ул Кузбасс һәм башка күмер чыгаручы төбәкләрнең тотрыклы үсешен тәэмин итәчәк», - дип белдерде премьер-министр.