Миңнеханов Таҗикстан энергетика һәм су ресурслары министры Далер Җума белән очрашты
Татарстан Республикасы Рәисе Рөстәм Миңнеханов Таҗикстан Республикасы энергетика һәм су ресурслары министры Далер Җума белән очрашты. Бу хакта ТР Рәисе матбугат хезмәте хәбәр итә.
Очрашу «Казан-Экспо» мәйданчыгында узды, анда бу көннәрдә «Энергопром» Казан халыкара электр энергетикасы форумы һәм аңа бәйле чаралар уза.
Искәртәбез, Таҗикстан Республикасы делегациясе «Энергопром» форумында, шулай ук БДБ Электр энергетикасы советының 68 нче утырышында катнаша.
Рөстәм Миңнеханов Таҗикстанның энергетика һәм су ресурслары министрына «Энергопром» форумы белән кызыксынуы өчен рәхмәт белдерде. Ул ассызыклаганча, Татарстан дустанә Россия-Таҗикстан мөнәсәбәтләре кысаларында Таҗикстан белән хезмәттәшлекне киңәйтү мөмкинлекләрен югары бәяли.
Рөстәм Миңнеханов Таҗикстан делегациясен «Россия – Ислам дөньясы: KazanForum» халыкара икътисади форумында, шулай ук башка чараларда, шул исәптән Татарстан нефть-газ химиясе форумында һәм башкаларда катнашырга чакырды.