Миңнеханов Казанда Советлар Союзы Герое Гани Сафиуллинга истәлек тактасын ачты
Бөек Ватан сугышында катнашучыларның кыюлыгы һәм батырлыгы республика халкының хәтерендә һәм йөрәкләрендә мәңгегә калачак, алар үсеп килүче татарстанлылар өчен үрнәк булып тора. Бу хакта Татарстан Президенты Рөстәм Миңнеханов Советлар Союзы Герое Гани Сафиуллинга мемориаль такта ачу тантанасында белдерде.
Вакыйга Казанның нәкъ үзәгендә узды. Истәлек тактасын элек герой яшәгән йорт диварына урнаштырдылар. Иртәдән, рәсми өлеш башланганчы ук, бу урынга кулларына чәчәкләр тоткан кешеләр килә башлады. Алар арасында иҗтимагый һәм ветераннар оешмалары вәкилләре, хәрби училище укучылары һәм Татарстанның герой якташлары тарихына битараф булмаганнар бар иде.
Соңрак мәйданчыкка Татарстан Президенты Рөстәм Миңнеханов, Казан мэры Илсур Метшин, хакимият органнары вәкилләре килде. Республика җитәкчесе чарага җыелучыларга Бөек Ватан сугышы елларында йөзләгән мең татарстанлының җиңү өчен сугышка китүе турында искәртте.
Шуларның берсе - Сталинград сугышында актив катнашкан Гани Сафиуллин, ул Идел ярларында фашист гаскәрләрен тар-мар итүгә зур өлеш керткән.
«Аның батырлыгы мәңгегә безнең хәтердә һәм йөрәктә калачак. <…> Бөек Ватан сугышы фронтларында Гани Сафиуллин үзен даһи һәм тәҗрибәле командир итеп күрсәтте. 37нче укчы дивизия командиры буларак, ул иң канкойгыч сугышларның берсе булган Сталинград янында немец гаскәрләрен тар-мар итүдә катнашты», - дип мөрәҗәгать итте вакыйгада катнашучыларга Рөстәм Миңнеханов.
Гани Сафиуллин шулай ук Смоленск сугышында, Донбасс һәм Харьков оборона операцияләрендә, Курск бәрелешендә һәм Днепр өчен сугышта катнашкан, дип өстәде ул. 1943 елда Гани Сафиуллинга кыюлыгы һәм батырлыгы өчен Советлар Союзы Герое исеме бирелде.
«2 февральдә илебез Сталинград сугышында немец-фашист гаскәрләрен тар-мар итүгә 80 ел тулуны билгеләп үтте. Без илебез геройлары истәлеген хәтерлибез һәм хөрмәт итәбез. Бөек Ватан сугышы чорында Татарстаннан Кызыл Армия сафларына 700 мең кеше чакырылган. Аларның яртысыннан артыгы һәлак булган һәм хәбәрсез югалган. Алар турында хәтер безнең йөрәктә мәңге яшәячәк», - диде Татарстан Президенты һәм һәлак булган геройларны бер минутлык тынлык белән искә алырга тәкъдим итте.
Аннары Рөстәм Миңнеханов вакыйгада катнашучылар белән бергә мемориаль тактага ал гөлчәчәк бәйләме салды.