Миңнеханов Катар әмире белән инвестицияләр һәм хезмәттәшлек турында фикер алышты
Татарстан Рәисе Рөстәм Миңнеханов Катар әмире Тамим бән Хәмәд әл Тани белән очрашу уздырды. Татарстан Республикасы җитәкчесе Катар ягы чакыруы буенча Дохага сәфәр кылды, дип хәбәр итте республика Рәисе матбугат хезмәте җитәкчесе Лилия Галимова.
Рөстәм Миңнеханов билгеләп үткәнчә, Россия Ислам дөньясы, Ислам хезмәттәшлеге оешмасы белән элемтәләрне үстерүгә зур әһәмият бирә. Ул шулай ук Катар компанияләрен Татарстандагы инвестицион проектларда катнашырга чакырды. Әңгәмәдәшләр ике як өчен дә кызыклы булган конкрет юнәлешләргә тукталды.
Моннан тыш, Рөстәм Миңнеханов Берләшкән Гарәп Әмирлекләре вице-президенты Мансур Ибн Зәйд әл-Нахайян белән «Россия — Ислам дөньясы» стратегик караш төркеме кысаларында хезмәттәшлек итү мәсьәләләре турында фикер алышты. Ул Берләшкән Гарәп Әмирлекләре җитәкчелегенә Дәүләт оешу көне уңаеннан котлауларын җиткерде. Әңгәмәдәшләр шулай ук «Россия — Ислам дөньясы» стратегик караш төркеме кысаларындагы эшчәнлек турында сөйләште. Якын арада берләшмәнең күчмә утырышы була.