Миңнеханов Каравонда: Һәр халыкның мәдәниятен хөрмәт итәргә һәм яратырга кирәк
Бүген Татарстан Рәисе Рөстәм Миңнеханов республиканың Лаеш районы Никольское авылында «Каравон» рус халык бәйрәме кунакларын сәламләде. Бу хакта республика җитәкчесенең матбугат хезмәте хәбәр итә.
Рөстәм Миңнеханов «Каравон»ның елдан-ел матуррак булуын искәртте. «Бөтен кунакларга рәхмәт әйтәм – бу Лаеш районы һәм Татарстан гына түгел, ә башка төбәкләрдән килгән иҗат коллективлары да», – диде Рәис һәм Курск өлкәсенең Суджан шәһәреннән килгән «Криница» ансамблен аеруча җылы сәламләде, артистлар белән аралашып алырга да өлгерде.
Моннан тыш, республика җитәкчесе бәйрәмгә килгән махсус операция катнашучыларын алкышларга тәкъдим итте.
«Бүген Каравон – фольклор бәйрәме дә, Славян язуы бәйрәме дә, ә иң мөһиме – рус мәдәнияте бәйрәме. Без Каравон ачылганнан соң Идел буе халыклары бәйрәмнәрен башлап җибәрәбез. Киләсе айда Сабантуе була – бу татар мәдәнияте. Аннан соң мари, чуваш, удмурт мәдәниятләре бәйрәмнәре узачак», – дип искәртте Миңнеханов.
«Без бу бәйрәмнәрне һәрвакыт бик югары дәрәҗәдә уздырабыз. Бу безнең республиканың, илебез кебек үк, – күпмилләтле булуын аңлата. Һәм һәр милләтнең мәдәниятен хөрмәт итәргә, яратырга, халыкларыбызда булган гореф-гадәтләрне сакларга кирәк», – диде ул.
Татарстан Рәисе быелгы Каравонда һава торышы да уңай булды, диде. «Бәйрәм уңышлы булды дип саныйм. Барыгызга да ныклы сәламәтлек һәм уңышлар телим!» – дип йомгаклады Рөстәм Миңнеханов.
Лаеш районы башлыгы Илдус Зарипов үз чыгышында бәйрәмне оештыруда финанс ярдәме күрсәткән өчен республика җитәкчелегенә рәхмәт әйтте. Ул ел саен Каравон мәйданчыгы яңаруны, ә бәйрәм географиясе киңәюне әйтте.
«Бу аралашу, дуслык, без кунакларга чиксез шат. Без бергә булырга, бердәм булырга тиеш. Без бергә булганда гына илебез көчле, куәтле һәм җиңелмәс булачак!» – диде район башлыгы.
Моннан тыш, Рөстәм Миңнеханов Татарстан Республикасының дәүләт бүләкләрен дә тапшырды.