Миңнеханов һәм Левитин Өстәл теннисы буенча халыкара ярышларны ябу тантанасында катнашты
Татарстан Рәисе Рөстәм Миңнеханов һәм Россия Президенты киңәшчесе Игорь Левитин бүген көннең икенче яртысында Өстәл теннисы буенча халыкара ярышлар һәм Өстәл теннисы буенча XXIII ачык шәхси-команда республика ярышларын ябу тантанасында катнашты. Бу хакта «Рәсми Татарстан» порталы хәбәр итә.
Чара «САБА-АРЕНА» универсаль спорт комплексында (шәһәр тибындагы Байлар Сабасы бистәсе) узды. Анда шулай ук ТР спорт министры Владимир Леонов, ТР төзелеш, архитектура һәм ТКХ министры Марат Айзатуллин, ТР урман хуҗалыгы министры Равил Кузюров, ТР Фәннәр академиясе президенты Рифкать Миңнеханов һ.б. катнашты.
Искәртеп узабыз, Өстәл теннисы буенча халыкара ярышлар һәм Өстәл теннисы буенча XXIII ачык шәхси-команда республика ярышлары 2025 елның 28-30 мартында РСФСР һәм ТАССРның атказанган урманчысы, «Мактау билгесе» һәм «Октябрь революциясе» орденнары иясе Нургали Миңнеханов истәлегенә үткәрелде. Ярышлар РФ Спорт министрлыгының рәсми календарь планына кертелгән. Өстәл теннисы буенча турнир Байлар Сабасында ел саен уза. Быел турнирга Россия, Беларусь, Иран, Кытай, Таҗикстан һәм Үзбәкстаннан 250дән артык спортчы җыелды.
Рөстәм Миңнеханов һәм Игорь Левитин турнирда җиңүчеләрне бүләкләү тантанасында катнашты.
Игорь Левитин оештыручыларга – Татарстан Республикасына һәм РФ Өстәл теннисы федерациясенә рәхмәт белдерде, шулай ук бүген төбәктә өстәл теннисы белән шөгыльләнү өчен тагын биш спорт үзәге ачылуын искәртте.
ТР Рәисе Рөстәм Миңнеханов хәбәр иткәнчә, Татарстан әлеге турнирда спортчыларны күрүгә һәрвакыт шат булачак. «23 ел элек үткәрелә башлаган ярышлар хәзер инде халыкара дәрәҗәгә күтәрелде. Турнирны оештыручыларга, Саба районы хакимиятенә, өстәл теннисын яратучыларга, ә иң мөһиме – ярышларда катнашучыларга рәхмәт әйтәсем килә. Алар арасында чит илләрдән һәм Россия төбәкләреннән җыелган спортчылар да, Татарстан районнарыннан килгән вәкилләр дә бар. Сезгә спортта зур уңышлар теләп калам!», - диде Рөстәм Миңнеханов, спортчыларга һәм җанатарларга мөрәҗәгать итеп.
Бүләкләү тантанасында Россия Федерациясе һәм Татарстан Республикасы гимннары яңгырады.
Чара бергәләп фотога төшү белән тәмамланды. Моннан тыш, Рөстәм Миңнеханов Саба районында (Лесхоз бистәсендә) әтисе - РСФСР һәм ТАССРның атказанган урманчысы, «Мактау билгесе» һәм «Октябрь Революциясе» орденнары иясе Нургали Миңнеханов каберен дә зиярәт кылды.