Миңнеханов Дубайдагы күргәзмәдә Төрекмәнстан һәм Согуд Гарәбстаны павильоннарын карады
Татарстан Президенты Рөстәм Миңнеханов Дубайга сәфәре вакытында Expo Dubai 2020 Бөтендөнья күргәзмәсе павильонында булды. Ул Төрекмәнстан, Согуд Гарәбстаны павильоннары һәм «Мобильлек» зонасы белән танышты.
Миңнеханов иң элек Бөтендөнья күргәзмәсенең тарихына багышланган экспозицияне карады. Беренче күргәзмә 1851 елда Лондонда узган. Инде 170 ел ул кешелекнең иң алдынгы инновацияләре белән таныштыра торган платформа санала.
Фото: © tatarstan.ru
ТР Президенты алга таба танышкан «Мобильлек» тематик зонасы күргәзмәгә килүчеләргә алдынгы мобиль җайланмаларның ничек эшләвен күз күзләре белән күрергә мөмкинлек бирә. Анда шулай ук ясалма интеллект, зур мәгълүматлар, робототехника, автоном транспорт өлкәләрен берләштергән акыллы шәһәрләр эшчәнлегенең үрнәкләре тәкъдим ителгән.
Төрекмәнстан павильонында Миңнехановның игътибарын милли костюмнар һәм төрекмән келәмнәре җәлеп итте. Күргәзмәгә килүчеләргә шулай ук 3D-фильм ярдәмендә илнең тарихы, мәдәнияте, традицияләре, шулай ук перспективалы проектлары белән танышу мөмкинлеге бирелде.
Фото: © tatarstan.ru
Согуд Гарәбстаны павильоны күргәзмәдә зурлыгы ягыннан икенче урында тора. Ул гаять зур корыч параллелепипедтан гыйбарәт, аның эчендә интерактив идәнле 30 метрлы күпкырлы глобус җыелган. Биредә Татарстан Президенты мактаулы кунаклар китабында үз язмасын калдырды.