Миңнеханов ЦУМ турында: Анда шоурум түгел, ә реаль тормыш һәм һөнәрчеләр булырга тиеш
Казандагы Уникаль осталар үзәге (ЦУМ) Татарстан һәм тулаем республика мәдәниятенең йөзе булып тора, һәм анда мәйданчык таләпләренә туры килгән һөнәрчеләр эшләргә тиеш. Бу хакта Татарстан Республикасы Рәисе Рөстәм Миңнеханов Россия эшмәкәрлеге көне уңаеннан Татарстан эшмәкәрләре белән очрашуда белдерде.
«Бу безнең республикабыз һәм мәдәниятебезнең йөзе. Сез миннән инде бер тапкыр кисәтү алдыгыз – шоурум оештырдыгыз. Анда реаль тормыш, реаль һөнәрчеләр һәм реаль эшчәнлек булырга тиеш», - дип ассызыклады Миңнеханов.
Ул үзәкнең миссиясе һөнәрчелек товарларын җитештерү һәм сату гына түгел, ә яшьләрне дә өйрәтү булуына басым ясады.
«Сезнең үзәк Казанның нәкъ үзәгендә тора. Өч елга без сезгә сату гына түгел, ә яшьләрне укыту өчен дә ташламалар бирдек. Шәһәр үзәгендә өч ел. Сез безнең яшьләрне укытырга тиеш. Әгәр акча эшләргә телисез икән, сатыгыз, әмма сез үзегез җитештергәнне генә сатарга тиеш», - дип аңлатты Миңнеханов.
Татарстан осталарны һәм һөнәрчелек традицияләрен саклап калу өчен күп акча кертте, дип өстәде ул. Моннан тыш, республиканың планнарында алга таба да Уникаль осталар үзәген алга этәрү – башка регионнардан һәм илләрдән һөнәрчеләрне чакыру, бизнес-миссияләр оештыру һәм башкалар.
«Эшләргә кирәк. Яшьләребезне өйрәтегез һәм акча эшләргә өйрәнегез. Елына Казанга дүрт миллион турист килә. Барлык туристларны да шунда», - дип өстәде ТР Рәисе.