Миңнеханов Чаллыда алты ветеранга Җиңүнең 80 еллыгы медальләрен тапшырды
Татарстан Рәисе Рөстәм Миңнеханов Чаллыга эш сәфәре кысаларында алты ветеранга «1941-1945 еллардагы Бөек Ватан сугышында Җиңүгә 80 ел» юбилей медальләрен тапшырды. Бу хакта Татарстан лидерының рәсми сайтында хәбәр ителә.
Бүләкләр сугышта катнашкан Мөфтах Нуретдинов һәм Валентин Лысакка, блокадалы Ленинградта яшәгән Людмила Гадалина, элеккеге балигъ булмаган концлагерь тоткыннары Борис Кудряшов һәм Мария Тимонина, шулай ук тыл хезмәтчәне Анатолий Лазаревка тапшырылды.
Миңнеханов ветераннарны Бөек Җиңүнең юбилее белән котлады. Ул шулай ук Республикада яшәүче 700 меңгә якын кеше фронтка алыну, аларның яртысы һәлак булу яки хәбәрсез югалу турында әйтеп үтте. 200 меңнән артык Татарстан кешесе кыюлык һәм батырлык өчен бүләкләнде, 353 сугышчы Советлар Союзы Герое Алтын йолдызы белән бүләкләнде, 48 солдат Дан орденының тулы кавалеры булды.
«Без барыбыз да ата-бабаларыбыз буыны алдында бурычлы. Без Җиңүгә китергән кырыс сугыш юлын батырларча узган буынның гаҗәеп батырлыгы һәм рухи көче алдында баш иябез. Тарихны, ул еллардагы вакыйгаларны үзгәртеп сөйләргә тырышуларга карамастан, без дөньяны фашизмнан коткарган халкыбызның батырлыгы турында истәлекне кадерләп саклаячакбыз», - диде Татарстан Рәисе.
2025 ел Ватанны саклаучы елы дип игълан ителде, дип искәртте Миңнеханов. Татарстан Рәисе Россия солдатларының махсус хәрби операция зонасындагы каһарманлыгын билгеләп үтте. Ул шулай ук ветераннарга Чаллы шәһәрен һәм «КАМАЗ» заводын төзүдә катнашулары өчен рәхмәт белдерде.
«Сезнең бөек, мәңгелек батырлыгыгыз, рухи көчегез һәм кыюлыгыгыз алдында баш иям һәм иң ихлас рәхмәт сүзләремне җиткерәм. Шулай ук сезгә бүгенге иҗтимагый активлыгыгыз өчен дә рәхмәт. Сезнең акыллы һәм игелекле киңәшләрегез үсеп килүче буынга патриотик тәрбия бирүгә зур өлеш кертә. Сезгә нык сәламәтлек, тынычлык, муллык һәм иминлек телим», – диде Рөстәм Миңнеханов.
«Сугыш елларында безгә бертөрле авырлыкларны кичерергә туры килде, бик авыр булды. Кайгыртуыгыз өчен рәхмәт, безне беркайчан да онытмыйсыз. Татарстаныбыз чәчәк атуын телибез!» - диде Людмила Гадалина җавап итеп.
«1941-1945 еллардагы Бөек Ватан сугышында Җиңүгә 80 ел» юбилей медале Россия Президенты Владимир Путин указы белән гамәлгә куелды. Бүләк хәрби хәрәкәтләрдә катнашучыларга, партизаннарга, тыл хезмәтчәннәренә һәм гражданнарның башка категорияләренә Җиңү көне алдыннан тапшырыла.